شروط الاستخدام

أهلاً بيك بـ Admin X. هاي الشروط تنظم استخدامك للمنصة. لما تسوي حساب وتأشر على الموافقة، يعني إنت موافق عليها.

1. شنو هي المنصة

Admin X منصة لأصحاب المحلات، بيها بوت يرد على زبائنك بالذكاء الاصطناعي على الإنستغرام والواتساب والماسنجر، ويسجل الطلبات، ويا أدوات للمخزن والحسابات والتقارير حسب نوع اشتراكك.

2. حسابك

• الحساب يتسجل برقم موبايل عراقي، ونتأكد منه برمز على الواتساب.
• إنت مسؤول عن كلمة سرك وعن أي شي يصير من حسابك. لا تشاركها ويا أحد.
• إذا حسيت أحد دخل لحسابك، غيّر كلمة السر فوراً من «نسيت كلمة السر» وبلغنا.
• كل حساب يكون لمحل واحد.

3. الاشتراكات والتجربة المجانية

• كل خدمة إلها اشتراك شهري منفصل: البوت لكل بيج (إنستغرام، أو صفحة فيسبوك، أو رقم واتساب)، والمخزن والحسابات.
• سعر أول خدمة 100,000 دينار بالشهر، وكل خدمة إضافية 75,000 دينار بالشهر. والأسعار المحدثة دائماً بصفحة الاشتراك.
• كل خدمة جديدة إلها تجربة مجانية 7 أيام بكل الميزات، مرة وحدة لكل حساب مربوط. ما يصير تاخذ تجربة ثانية لنفس البيج أو الرقم حتى لو سويت حساب جديد بالمنصة.
• كل دفعة تفعّل الخدمة 30 يوم. تكدر تدفع بأي وقت، والشهر الجديد يبدي من آخر يوم بالشهر الحالي، فما يضيع عليك ولا يوم.
• التجديد يدوي، وماكو أي سحب تلقائي. نذكّرك بالجرس قبل ما تخلص أي خدمة بـ 3 أيام.
• إذا خلص اشتراك بيج، البوت يوكف عن الرد بهاي البيج بس، وبياناتك تبقى محفوظة وترجع أول ما تجدد.
• كل بيج تكدر تبدل حسابها المربوط مرة وحدة كل 7 أيام.
• الإلغاء والاسترجاع حسب سياسة الاسترجاع والإلغاء.

4. الاستخدام العادل

ردود البوت بدون حد للرسائل. بس إذا الاستخدام صار أعلى بهواية من المعتاد لمحل واحد، نتواصل ويّاك حتى نتفق على اشتراك يناسب حجم شغلك، وما نوكف البوت بدون ما نبلغك.

5. الاستخدام الممنوع

• بيع أي شي ممنوع بالقانون العراقي، أو الاحتيال على الزبائن، أو إرسال رسائل مزعجة.
• محاولة الدخول لحسابات غيرك، أو التلاعب بالمنصة، أو تحميلها فوق طاقتها عن قصد.
• مخالفة شروط Meta (إنستغرام وفيسبوك وواتساب) بالحساب المربوط.

إذا صار أي شي من هذا، نكدر نوقف الحساب.

6. ردود البوت

البوت يعرّف نفسه للزبون بأول رد إنه المساعد الذكي لمحلك، ويرد حسب معلومات محلك اللي إنت تكتبها (الأسعار، والتوصيل، والسياسات). راجع المعلومات دائماً، لأن البوت ممكن يغلط أحياناً مثل أي نظام ذكاء اصطناعي. وإنت المسؤول عن الاتفاق النهائي ويا زبائنك. وتكدر تستلم أي محادثة بنفسك بأي وقت.

7. توفر الخدمة

نحاول المنصة تبقى شغالة طول الوقت، بس ممكن تصير توقفات للصيانة، أو بسبب خدمات خارجية مثل Meta أو شركات التوصيل أو الإنترنت.

8. تغيير الشروط

ممكن نحدث هاي الشروط. إذا التغيير مهم، نبلغك داخل المنصة قبل ما يبدي.

9. التواصل

لأي سؤال، تواصل ويانه من داخل المنصة.

شوف كمان صفحة تواصل ويانه.